27 Setyembre 2026

Ika-26 na Linggo sa Karaniwang Panahon (A)

Ebanghelyo At Mga Pagbasa

“Ano ang palagay ninyo rito? May isang tao na may dalawang anak na lalaki....” (Mateo 21:28)

Unang Pagbasa: Ezekiel 18:25-28

Ito ang sinasabi ng Panginoon: “Marahil ay sasabihin ninyong hindi tama itong ginagawa ko. Makinig kayo, mga Israelita: Matuwid ang aking tuntunin, ang pamantayan ninyo ang baluktot. 

Kapag ang isang taong matuwid ay nagpakasama, mamamatay siya dahil sa kasamaang ginawa niya. At ang masamang nagpakabuti at gumawa ng mga bagay na matuwid ay mabubuhay. Dahil sa pagtalikod sa nagawa niyang kasamaan noong una, mabubuhay siya, hindi mamamatay.”

Salmo: Awit 24

Tugon: Poon, iyong gunitain, 
            wagas mong pag-ibig sa ‘kin!

Ang kalooban mo’y ituro, O Diyos, 
ituro mo sana sa aba mong lingkod; 
ayon sa matuwid, ako ay turuan, 
ituro mo Poon, ang katotohanan; 
tagapagligtas ko na inaasahan.

Poon, gunitain, pag-ibig mong wagas, 
at ang kabutihang noon pa’y nahayag. 
Patawarin ako sa pagkakasala, 
sa kamalian ko nang ako’y bata pa; 
pagkat pag-ibig mo’y hindi nagmamaliw, 
ako sana, Poon, ay alalahanin!

Mabuti ang Poon at makatarungan, 
sa mga salari’y guro at patnubay; 
sa mababang-loob siya yaong gabay, 
at nagtuturo ng kanyang kalooban.

Ikalawang Pagbasa: Filipos 2:1-11

Mga kapatid: Nagbibigay ba sa inyo ng kasiglahan ang buhay na nakaugnay kay Kristo? Naaaliw ba kayo ng kanyang pag-ibig? May pagkakaisa ba kayo sa Espiritu Santo? Kayo ba’y may nadaramang hangarin na tumulong sa iba? Kung gayon, lubusin ninyo ang aking kagalakan – maghari sa inyo ang pagkakasundo, mabuklod kayo ng iisang pag-ibig at maging isa kayo sa puso’t diwa. Huwag kayong gagawa ng anumang bagay dahil lamang sa hangad ninyong matanyag, bagkus magpakababa kayo at huwag ipalagay na kayo’y mabuti kaysa iba.  Ipagmalasakit ninyo ang kapakanan ng iba, hindi lamang ang sa inyong sarili. 

Magpakababa kayo tulad ni Kristo Hesus: Na bagama’t siya’y Diyos, hindi nagpilit na manatiling kapantay ng Diyos, bagkus hinubad niya ang lahat ng katangian ng pagka-Diyos, nagkatawang-tao at namuhay na isang alipin. Nang maging tao, siya’y nagpakababa at naging masunurin hanggang kamatayan, oo, hanggang kamatayan sa krus.

Kaya naman, siya’y itinampok ng Diyos at binigyan ng pangalang higit sa lahat ng pangalan. Anupa’t ang lahat ng nilalang na nasa langit, nasa lupa, at nasa ilalim ng lupa ay maninikluhod at sasamba sa kanya. At ipapahayag ng lahat na si HesuKristo ang Panginoon, sa ikararangal ng Diyos Ama! 

Mabuting Balita: Mateo 21:28-32

Noong panahong iyon, sinabi ni Hesus sa mga punong saserdote at mga matatanda ng bayan: “Ano ang palagay ninyo rito? May isang tao na may dalawang anak na lalaki. Lumapit siya sa nakatatanda at sinabi, ‘Anak, lumabas ka at magtrabaho sa ubasan ngayon.’ ‘Ayoko po,’ tugon niya. Ngunit nagbago ang kanyang isip at siya’y naparoon. Lumapit din ang ama sa ikalawa at gayundin ang kanyang sinabi. ‘Opo,’ tugon nito, ngunit hindi naman naparoon. 

Sino sa dalawa ang sumunod sa kalooban ng kanyang ama?” “Ang nakatatanda po,” sagot nila. Sinabi sa kanila ni Hesus, “Sinasabi ko sa inyo: ang mga publikano at masasamang babae’y nauuna pa sa inyong pasakop sa paghahari ng Diyos. Sapagkat naparito sa inyo si Juan at ipinakilala ang matuwid na pamumuhay, at hindi ninyo siya pinaniwalaan. Ngunit pinaniwalaan siya ng mga publikano at ng masasamang babae. Nakita ninyo ito, subalit hindi pa rin kayo nagsisi at naniwala sa kanya.” 

Gospel Reflection

Mapait Na Katotohanan

Religious people aren't more likely to do good than their nonreligious counterparts. Researchers found that religious and nonreligious people commit similar numbers of moral acts. 

Ito ang findings ng isang pag-aaral na ini-report ng Yahoo! News [noong 2014] sa pamamagitan ng isang artikulong may pamagat na Religion Doesn't Make People More Moral, Study Finds.

[Luma na ang findings na ito] subalit nakakalungkot ang realidad na sinasalamin ng nasabing resulta. Ipinapakita nito ang kahinaan ng mga tinatawag na lingkod ng Diyos. Na wala tayong kaibahan sa mga taong itinuturing na makasalanan.

Marami sa atin ang naglilingkod sa loob ng simbahan pero hindi sa labas nito. Nagbibigay ng oras ngunit hindi ng pagmamahal. Naglilingkod sa altar pero hindi sa pang-araw-araw na pamumuhay. Nagdarasal at nagpupuri sa pamamagitan ng mga nguso subalit hindi nagmumula sa puso. Kunwaring naglilingkod pero hindi sumusunod.

Sa Ebanghelyo natin ngayong Linggo, hinahamon tayo ng Panginoong Hesus na suriin ang ating mga buhay. Totoo bang sumusunod tayo sa Kanyang mga utos? Namumuhay ba talaga tayo sa landas ng katotohanan ni Kristo? O baka naman puro lang tayo salita. O katulad lamang tayo ng mga pariseo at ng mga eskriba na panlabas at paimbabaw lang ang pagiging maka-Diyos?

Baka nga ito ang dahilan kung bakit hindi natin mai-share si Hesus sa iba. Paano natin ishi-share ang wala sa atin? Paano natin ibabahagi si Hesus sa kapwa natin kung wala Siya sa atin?

Kasabay ng pagsusuri natin sa ating mga sarili, hingin natin sa Espiritu Santong gabayan tayong tumulad sa mga sumunod kay Hesus. Magawa sana natin pagsisihan at talikuran ang ating mga kasalanan. Mamuhay sa halimbawa ni HesuKristo. Magawa sana nating sundan ang Kanyang landas kahit na mahirap.

Tunay na magmahal. Mula sa puso at hindi sa nguso.

Panalangin:

O aming Amang hindi tumitigil na mahabag sa amin, pagsamba at pagluwalhati ang handog namin sa Iyo. Kami'y mga makasalanan subalit patuloy Mo po kaming pinatatawad at minamahal. Ipinagbubunyi po naming lagi ang Iyong banal na pangalan.

Turuan Mo po kaming tunay na sumunod sa Iyong kalooban. Makita po sana ang Iyong kaluwalhatian sa pang-araw-araw naming mga buhay. Si Hesus po sana ang maging sentro ng aming paglilingkod.

Ama, pagmamahal Mo po ang dahilan kung bakit kami naririto, hayaan Mo pong ibahagi namin sa aming kapwa ang pagmamahal Mo sa pamamagitan ng mapagkumbabang pagsunod sa Iyong kalooban.

Ang lahat ng ito sa Pangalan ni Hesus, nabubuhay at naghahari kasama Mo at ng Espiritu Santo. Amen.