25 Oktubre 2026

Ika-30 Linggo sa Karaniwang Panahon (A)

Ebanghelyo At Mga Pagbasa

“Sa dalawang utos na ito nakasalalay ang buong Kautusan ni Moises at ang turo ng mga propeta.” (Mateo 22:40)

18 Oktubre 2026

Ika-29 na Linggo sa Karaniwang Panahon (A)

Linggo ng Misyong Pandaigdigan

Ebanghelyo At Mga Pagbasa

“Kung gayon, ibigay ninyo sa Cesar ang sa Cesar, at sa Diyos ang sa Diyos.” (Mateo 22:21)

11 Oktubre 2026

Ika-28 Linggo sa Karaniwang Panahon (A)

Ebanghelyo At Mga Pagbasa 

"Sapagkat marami ang tinatawag, ngunit kakaunti ang nahihirang.”

(Mateo 22:14)

4 Oktubre 2026

Ika-27 Linggo sa Karaniwang Panahon (A)

Ebanghelyo At Mga Pagbasa

Kaya’t siya’y sinunggaban nila, inilabas sa ubasan at pinatay. 

(Mateo 21:39)

27 Setyembre 2026

Ika-26 na Linggo sa Karaniwang Panahon (A)

Ebanghelyo At Mga Pagbasa

“Ano ang palagay ninyo rito? May isang tao na may dalawang anak na lalaki....” (Mateo 21:28)

20 Setyembre 2026

Ika-25 Linggo sa Karaniwang Panahon (A)

Ebanghelyo At Mga Pagbasa

‘Pumaroon din kayo at magtrabaho sa aking ubasan, at bibigyan ko kayo ng karampatang upa.’ (Mateo 20:4)

13 Setyembre 2026

Ika-24 Linggo sa Karaniwang Panahon (A)

Ebanghelyo At Mga Pagbasa

“Panginoon, makailan kong patatawarin ang aking kapatid na paulit-ulit na nagkakasala sa akin? Makapito po ba?” (Mateo 18:21)

06 Setyembre 2026

Ika-23 Linggo sa Karaniwang Panahon (A)

Ebanghelyo At Mga Pagbasa

“Kung magkasala sa iyo ang kapatid mo, puntahan mo siya at kausapin nang sarilinan. Kapag nakinig siya sa iyo, ang pagsasama ninyong magkapatid ay napapanauli mo sa dati at napanunumbalik mo siya sa Ama.” (Mateo 18:15)

30 Agosto 2026

Ika-22 Linggo sa Karaniwang Panahon (A)

Ebanghelyo At Mga Pagbasa

“Kung ibig ninumang sumunod sa akin, limutin niya ang ukol sa kanyang sarili, pasanin ang kanyang krus at sumunod sa akin." (Mateo 16:24)

23 Agosto 2026

Ika-21 Linggo sa Karaniwang Panahon (A)

Ebanghelyo At Mga Pagbasa

“Kayo naman, ano ang sabi ninyo? Sino ako?” (Mateo 16:15)

16 Agosto 2026

Ika-20 Linggo sa Karaniwang Panahon (A)

Ebanghelyo At Mga Pagbasa

“Tunay nga po, Panginoon,” tugon ng babae, “ngunit ang mga tuta man ay nagsisikain ng mumong nalalaglag sa hapag ng kanilang panginoon.” (Mateo 15:27)

09 Agosto 2026

Ika-19 na Linggo sa Karaniwang Panahon (A)

Ebanghelyo At Mga Pagbasa

“Sagipin ninyo ako, Panginoon!” (Mateo 14:30)

02 Agosto 2026

Ika-18 Linggo sa Karaniwang Panahon (A)

Ebanghelyo At Mga Pagbasa

Kinuha ang limang tinapay at dalawang isda; tumingala siya sa langit at nagpasalamat sa Diyos. Pinaghati-hati niya ang mga tinapay at iniutos sa mga alagad na ipamigay iyon sa mga tao. Kumain silang lahat at nabusog. 

(Mateo 14:19-20)

26 Hulyo 2026

Ika-17 Linggo sa Karaniwang Panahon (A)

Ebanghelyo At Mga Pagbasa

“Nang makakita ng isang perlas na napakahalaga, siya’y humayo at ipinagbili ang lahat ng kanyang ari-arian at binili iyon. ” (Mateo 10:31)

19 Hulyo 2026

Ika-16 na Linggo sa Karaniwang Panahon (A)

Ebanghelyo At Mga Pagbasa

“Ang Anak ng Tao ang naghahasik ng mabuting binhi. Ang bukid ay ang sanlibutan. Ang mga taong pinaghaharian ng Diyos ang mabuting binhi at ang mga taong pinaghaharian ng diyablo ang masasamang damo.” (Mateo 13:37-38)

12 Hulyo 2026

Ika-15 Linggo sa Karaniwang Panahon (A)

Ebanghelyo At Mga Pagbasa Sa Linggo

“Ngunit ang binhing nalaglag sa mabuting lupa ay nag-uhay: may tigsasandaan, may tigaanimnapu, at may tigtatatlumpung butil ang bawa’t uhay.” (Mateo 13:8)

05 Hulyo 2026

Ika-14 na Linggo sa Karaniwang Panahon (A) 

Ebanghelyo At Mga Pagbasa

“Lumapit kayo sa akin, kayong lahat na napapagal at nabibigatan sa inyong pasanin, at kayo’y pagpapahingahin ko.” (Mateo 11:28)

28 Hunyo 2026

Ika-13 Linggo sa Karaniwang Panahon

Ebanghelyo At Mga Pagbasa

“At sinumang magbigay ng kahit isang basong tubig na malamig sa isa sa maliliit na ito dahil sa ito’y alagad ko – tinitiyak ko sa inyong tatanggap siya ng gantimpala.” (Mateo 10:42)

21 Hunyo 2026

Ika-12 Linggo sa Karaniwang Panahon (A)

Ebanghelyo At Mga Pagbasa Sa Linggo

“Kaya, huwag kayong matakot; higit kayong mahalaga kaysa libu-libong maya.” (Mateo 10:31)

Unang Pagbasa: Jeremias 20:10-13

Sinabi ni Jeremias: Naririnig kong nagbubulungan ang karamihan. Tinagurian nila akong “kilabot saanman.” Sinasabi nila, “Isuplong natin! Isuplong natin!” Pati matatalik kong kaibiga’y naghahangad ng aking kapahamakan. Wika pa nila, “Marahil ay malilinlang natin siya; pagkatapos, dakpin natin at paghigantihan.” 

Subalit ikaw’y nasa panig ko, Poon, malakas ka’t makapangyarihan; madarapa ang lahat ng umuusig sa akin, hindi sila magtatagumpay kailanman. Mapapahiya sila sapagkat hindi sila magwawagi. Mapapahiya sila habang panahon, at ito’y hindi na makakalimutan. 

 Makatarungan ka kung sumubok sa mga tao, Poon, Diyos na Makapangyarihan, alam mo ang laman ng kanilang mga puso’t isip. 

Kaya’t ikaw ang maghiganti sa mga kaaway ko, ipinagkakatiwala ko sa mga kamay mo ang aking kapakanan. Awitan ninyo ang Poon, inyong purihin ang Poon sapagkat inililigtas niya ang mga api mula sa kamay ng mga gumagawa ng masama. 

Salmo: Awit 68

Tugon: Panginoon, iyong dinggin 

            akong iyong ginigiliw!

Dahilan sa iyo, ako’y inaglahi, 

napahiyang lubos sa pagkaunsiyami. 

Sa mga kapatid parang ako’y iba, 

kasambahay ko na’y di ako kilala. 

Ang pagmamahal ko sa banal mong templo, 

matinding-matindi sa kalooban ko; 

sa akin bumagsak, paghamak sa iyo. 

At sa ganang akin, ako’y dadalangin sa iyo, 

O Poon, sana’y iyong dinggin 

sa mga panahon na iyong ibigin; 

dahil sa dakilang pag-ibig sa akin, 

ang iyong pangakong pagtubos ay sundin. 

Poon, sa buti mo’t pagibig sa akin, 

sa aking pagtawag ako sana’y dinggin, 

sa pagkahabag mo, ako ay lingapin. 

Kung makita ito niyong mga dukha, 

sila ay sasamba sa laki ng tuwa. 

Dinirinig ng Diyos ang may kailangan, 

lingkod na bilanggo’y di nalilimutan. 

Ang Diyos ay purihin ng langit at lupa, 

maging karagata’t naroong nilikha! 

Ikalawang Pagbasa: Roma 5:12-15

Mga kapatid: Ang kasalana’y pumasok sa sanlibutan sa pamamagitan ng isang tao, at ang kamatayan sa pamamagitan ng kasalanan niya. Dahil dito, lumaganap ang kamatayan sa lahat ng tao sapagkat ang lahat ay nagkasala. Nasa sanlibutan na ang kasalanan bago pa ibinigay ang Kautusan, ngunit walang pinananagot sa kasalanan kung walang Kautusan. Gayunman, naghari ang kamatayan mula kay Adan hanggang kay Moises, kahit sa mga tao na ang pagkakasala’y di-tulad ng pagsuway ni Adan. 

Si Adan ay anino ng isang darating. Ngunit magkaiba ang dalawang ito, sapagkat ang kagandahang-loob ng Diyos ay higit na di hamak kaysa pagsuway ni Adan. Totoo ngang nagdala ng kamatayan sa marami ang pagsuway ni Adan, ngunit malaki ang kahigtan ng kagandahangloob ng Diyos at ng kaloob na dumating sa napakarami sa pamamagitan ng isang tao – si Hesukristo.

Mabuting Balita: Mateo 10:26-33

Noong panahong iyon, sinabi ni Hesus sa kanyang mga apostol, “Huwag kayong matakot sa mga tao. Walang natatago na di malalantad, o nalilihim na di mabubunyag. Ang sinasabi ko sa inyo sa dilim, ulitin ninyo sa liwanag; at ang ibinulong sa inyo ay inyong ipagsigawan. Huwag ninyong katakutan ang pumapatay ng katawan ngunit hindi nakapapatay ng kaluluwa. Sa halip, ang katakutan ninyo’y ang nakapapatay ng kaluluwa at katawan sa impiyerno. 

Hindi ba ipinagbibili ang maya nang dalawa isang pera? Gayunman, kahit isa sa kanila’y hindi nahuhulog sa lupa kung hindi kalooban ng inyong Ama. Maging ang buhok ninyo’y bilang na lahat. Kaya, huwag kayong matakot; higit kayong mahalaga kaysa libu-libong maya. 

Ang sinumang kumilala sa akin sa harapan ng mga tao ay kikilanlin ko rin naman sa harapan ng aking Amang nasa langit. Ngunit ang magtatwa sa akin sa harapan ng mga tao ay itatatwa ko rin naman sa harapan ng aking Amang nasa langit.” 

Gospel Reflection

Fear Not!

Marami tayong mga kinatatakutan. Kabiguan. Broken heart. Pagkakasakit. Kamatayan. 

May mga dahilan tayo para matakot. Nasa balita ang mga nakatatakot na pangyayari. Kaguluhan. Aksidente. Krimen. Sakuna. 

Ang iba nama'y may iba pang kinatatakutan o ang tinatawag na phobia. Takot sa matataas na lugar. Takot sa gagamba o sa ibang insekto. Takot sa dilim. Takot sa tao. Takot sa masisikip na lugar.

Mayro'n pa tayong tinatawag na stage fright o takot sa pagharap, pagpe-perform at pagharap sa maraming tao.

At hindi maganda ang epekto ng takot sa atin. Natataranta tayo kapag takot tayo. Dahil sa taranta, hindi nagiging maayos ang ating mga desisyon. Sumasablay tayo. Nakagagawa ng maling hakbang.

Malinaw ang mensahe ni Hesus sa Ebanghelyo natin ngayong Linggo. Huwag tayong matakot. Magtiwala tayo sa Diyos. Manalig tayong lagi natin Siyang kasama. Hindi Niya tayo pababayaan. 

Na kahit anupaman ang nangyayari sa buhay natin ngayon, may Diyos tayong makakapitan. May Diyos tayong laging nakasubaybay sa atin. Na laging magtatanggol sa atin.

Na mamatay man ang ating katawang-lupa, may buhay na walang-hanggan sa sinumang sumasampalataya kay Hesus at tinatanggap Siya bilang personal na Tagapagligtas. Na kung sinusunod at isinasabuhay natin ang Kanyang mga turo, hindi tayo dapat mangamba.

Sinabi ito ni Hesus sa Kanyang mga alagad para sabihin sa kanila ang mga paghihirap na darating sa kanila. Na daranas sila ng mga pag-uusig at mga pasakit sa pagpapahayag nila ng Mabuting Balita.

Hindi higit na dakila ang alipin sa kanyang panginoon. Kung si Hesus nga na ating Panginoon ay dumanas ng mga paghihirap, tayo pa kayang mga lingkod lamang. Hindi tayo higit na dakila kay Hesus.

Ipinangako ng Diyos sa bayang Israel, "Ako'y sasaiyo, huwag kang matakot, ako ang iyong Diyos, hindi ka dapat mangamba. Palalakasin kita at tutulungan, iingatan at ililigtas." (Isaias 41:10)

Sinabi pa ni Hesus sa pagtatapos ng ating Gospel episode, "ang sinumang kumilala sa akin sa harapan ng mga tao ay kikilanlin ko rin naman sa harapan ng aking Amang nasa langit. Ngunit ang magtatwa sa akin sa harapan ng mga tao ay itatatwa ko rin naman sa harapan ng aking Amang nasa langit."

Kaya huwag tayong matakot. 

Panalangin:

Ama, Panginoon namin noon, ngayon at magpakailanman. Pagluwalhati at pagsamba ang handog namin sa Iyong paanan.

Narito kaming mga lingkod Mong sa Iyo'y nagsusumikap na sumunod. Ipagkaloob Mo po sa aming lagi ang Iyong Banal na Espiritung gabay, lakas at pag-asa namin sa pagharap namin sa pang-araw-araw na pagsubok sa aming buhay.

Alisin Mo po sa aming puso at isipan ang lahat ng aming takot at pag-aalinlangan. Magawa po sana naming tumulad sa Iyong Bugtong na Anak na sumunod sa Iyong kalooban sa kabila ng mga paghihirap. (Sa panahon pong ito ng pandemya, tulungan Mo po kaming lalong kumapit at magtiwala sa Iyo.)

Bigyan Mo po kami ng pusong handang magtiis at ng isipang handang maniwala sa Iyong kapangyarihan maging anuman ang aming kalagayan sa buhay.

Ang lahat ng ito sa matamis na pangalan ni Hesus, naghaharing kasama Mo at ng Espiritu Santo. Amen.

14 Hunyo 2026

Ika-11 Linggo sa Karaniwang Panahon (A)

Ebanghelyo At Mga Pagbasa

"Sagana ang anihin, ngunit kaunti ang mag-aani. Idalangin ninyo sa may-ari ng anihin na magpadala siya ng mga manggagawa sa kanyang aanihin." (Mateo 9:37-38)

Unang Pagbasa: Exodo 19:2-6

Noong mga araw na iyon, mula sa Refidim, nagpatuloy ang mga anak ni Israel sa ilang ng Sinai at nagkampo sa tapat ng bundok. Si Moises naman ay umakyat ng bundok upang makipag-usap sa Diyos.

Sinabi sa kanya ng Panginoon, "Ito ang sabihin mo sa buong angkan ni Jacob, sa buong Israel. 'Nakita ninyo ang ginawa ko sa mga Egipcio. At tulad ng pangangalaga ng isang agila sa kanyang mga inakay, kayo'y aking kinupkop. 

Kung susundin ninyo ako at hindi kayo sisira sa pakikipagtipan ko sa inyo, kayo ang magiging bayan kong hinirang. Ang buong daigdig ay akin ngunit kayo'y aking itatangi. Kayo'y gagawin kong bayan ng mga saserdote na maglilingkod sa akin, nakatalaga sa akin.'"

Salmo: Awit 100

Tugon: Lahat tayo’y kanyang bayan,

kabilang sa kanyang kawan! 

Umawit sa kagalakan ang lahat ng mga bansa! 

Panginoo'y papurihan, paglingkuran siyang kusa;

lumapit sa harap niya at umawit na may tuwa! 

Ang Panginoo'y ating Diyos! Ito'y dapat na malaman, 

tayo'y kanya, kanyang lahat, tayong lahat na nilalang; 

lahat tayo'y bayan niya, kabilang sa kanyang kawan.

Mabuti ang Panginoon, pag-ibig niya'y walang hanggan. 

Siya'y Diyos na mabuti't laging tapat kailanman.

Ikalawang Pagbasa: Roma 5:6-11

Mga kapatid: Noong tayo'y mahihina pa, namatay si Kristo sa takdang panahon para sa mga makasalanan.

Mahirap mangyaring ialay ninuman ang kanyang buhay alang-alang sa isang taong matuwid -- bagamat maaaring may mangahas na gumawa nito alang-alang sa isang mabuting tao.

Ngunit ipinadama ng Diyos ang kanyang pag-ibig sa atin nang mamatay si Kristo para sa atin noong tayo'y makasalanan pa.

At ngayong napawalang-sala na tayo sa pamamagitan ng kanyang dugo, lalo nang tiyak na maliligtas tayo sa poot ng Diyos sa pamamagitan niya. Dati, tayo'y mga kaaway ng Diyos, ngunit ngayon, tinatanggap na niya tayong mga kaibigan alang-alang sa pagkamatay ng kanyang Anak. Kaya't tiyak ang pagkaligtas natin sa pamamagitan ng pagiging buhay ni Kristo. Hindi lamang ito! Nagagalak tayo't nagpupuri sa Diyos sa pamamagitan ng ating Panginoong Hesukristo sapagkat dahil sa kanya ay tinanggap tayo ng Diyos na mga kaibigan niya.

Mabuting Balita: Mateo 9:36-10:8

Noong panahong iyon, nang nakita ni Hesus ang napakaraming tao, nahabag siya sa kanila sapagkat sila'y lito at lupaypay, parang mga tupang walang pastol. Kaya't sinabi niya sa kanyang mga alagad, "Sagana ang anihin, ngunit kaunti ang mag-aani. Idalangin ninyo sa may-ari ng anihin na magpadala siya ng mga manggagawa sa kanyang aanihin."

Tinipon ni Hesus ang labindalawang alagad at binigyan ng kapangyarihang magpalayas ng masasamang espiritu at magpagaling ng mga may karamdaman. 

Ito ang pangalan ng labindalawang apostol: si Simon na tinatawag na Pedro at si Andres na kanyang kapatid; sina Santiago at Juan na mga anak ni Zebedeo; sina Felipe at Bartolome; si Tomas, at si Mateo na publikano; si Santiago na anak ni Alfeo, at si Tadeo; si Simong makabayan at si Judas Iscariote, ang nagkanulo kay Hesus.

Ang labindalawang ito'y sinugo ni Hesus at kanyang pinagbilinan: "Huwag kayong pupunta sa lugar ng mga Hentil, o sa alinmang bayan ng mga Samaritano. Sa halip ay hanapin ninyo ang mga nawawalang tupa ng sambahayan ng Israel. Humayo kayo at ipangaral ninyo na malapit nang maghari ang Diyos. Pagalingin ninyo ang mga maysakit at buhayin ang mga patay. Pagalingin ninyo ang mga ketongin at palayasin ang mga demonyo. Yamang tumanggap kayo nang walang bayad, magbigay naman kayo nang walang bayad."

Gospel Reflection

Kahit May Creative Block Pa

Para sa isang lingkod ng simbahan at ng Kristiyanong komunidad, may mga pagkakataong parang napakahirap maging tagapagpahayag ng Mabuting Balita ni Hesus.

Maraming mga balakid upang magawa ito. Minsan nga, mismong kapamilya pa natin ang nagiging hadlang.

Sa kaso naming mga tagapagpahayag sa internet-- sa kaso ko'y sa pamamagitan ng blog na ito-- hindi nawawala ang mga pagkakataong nagkakaroon kami ng tinatawag na creative block. Ito 'yung mga pagkakataong kahit anong gawin mo ay para kang na-stock sa creative process. Na parang kahit anong piga ang gawin mo ay walang lumalabas na mga bagong ideya sa iyo.

"Sagana ang anihin, ngunit kaunti ang mag-aani. Idalangin ninyo sa may-ari ng anihin na magpadala siya ng mga manggagawa sa kanyang aanihin." 

Madaling magpahayag kapag high na high ka pa galing sa isang retreat o sa isang seminar. Pero paano kapag feeling mo na-drain ka na? Bilang isang isinugo, kailangang magpatuloy dahil hindi nagpapahinga ang kalaban.

Katulad ng mga apostol ni Hesus sa ating Ebanghelyo, tayo rin ay isinusugo ni Hesus. Pinahahayo Niya tayo. Pinalalabas sa ating mga comfort zones para ibahagi sa kapwa ang Kanyang Salita. Araw-araw Niya tayong isinusugo. Hindi man sa malalayong lugar at hindi man bilang mga pari o madre o katekista, tayo'y isinusugo Niya sa mga tao sa paligid natin. Hinihimok Niya tayong ipahayag sa kanila ang kapayapaang hatid ng Kanyang pag-ibig. Na maaari nilang kamtin sa buhay na ito ang paghahari ng Diyos.

Sa pakikihati natin sa misyon ni Hesus bilang mga pari, propeta at hari, tayo'y isinusugo Niya kung paanong isinugo Siya ng Ama, patuloy sana nating ibigay ang lahat ng ating makakaya. Ialay natin sa Kanya ang ating tatlong "T"-- talent, time at treasures. Idalangin natin sa Kanya na ipagkaloob sa atin ang Espiritu Santo upang makagampan tayo sa mga katungkulang iniaatang sa atin-- sa tahanan man o sa trabaho, sa komunidad man o sa simbahan.

Patuloy ang pagpapahayag ng Mabuting Balita. Hindi dahil sa nararamdaman natin. Dahil ang pag-ibig natin sa Diyos bilang isang isinugo ay hind nakabase sa nararamdaman lamang, kundi sa pananampalatayang nakaugat kay Kristo na nagmahal sa atin kahit na noong tayo'y makasalanan pa. Kahit na may creative block pa!

Panalangin:

O aming Diyos Ama, purihin, luwalhatiin at sambahin Ka ng Iyong bayang inutusan ng Iyong Anak na magmahalan kung paanong iniibig Mo kami.

Ipadala Mo po sa amin ang Espiritu Santo na Siyang lakas at pag-asa namin. Ipagkaloob Mo po sa amin ang katatagan upang magawa naming lumabas sa aming mga sarili. Upang magawa naming i-extend ang aming mga braso sa pagyakap sa aming kapwang katulad nami'y naghahangad ng pagmamahal mula sa Iyo.

Ipagkaloob Mo po sa amin ang kapayapaang sa Iyo lamang nagmumula.

Aming Ama, napakarami ng aanihin ngunit kakaunti ang mga mag-aani (Lucas 10:2), idinadalangin po naming magpadala pa po kayo ng mga mangagawa upang higit na marami ang maabot ng Mabuting Balita. Idinadalangin po namin ang mga kabataan, tulungan po Ninyo silang piliin ang kanilang bokasyon ayon sa gabay ng Iyong Espiritu.

Idinadalangin din po namin ang mga katekista-- at mapagtanto sana naming lahat ng Katoliko ay katekista. Bigyang po Ninyo ng lakas ang aming Santo Papa , mga obsipo at ang aming kaparian. Unahin po sana Nila ang kapakanan ng Iyong Simbahan.

Ang lahat ng ito sa Pangalan ni Hesus, kasama Mo at ng Espiritu Santo. Amen.