Magandang buhay po sa inyong lahat!
Matapos ang halos isang taong hiatus (pagpapahinga), ibinabalik natin ang mga posts dito sa Sa Isa Pang Sulyap...
Isa po itong bagong simula na nataon naman sa Unang Linggo ng Adbiyento-- ang unang araw ng kalendaryong liturhikal ng Simbahang Katolika.
Malapit na ang Pasko. Inaanyayahan tayo ng ating Ebanghelyo na maghanda. Maghanda hindi lamang sa pagdiriwang ng Pasko ngunit higit sa lahat sa muling pagbabalik ng ating Panginoong HesuKristo.
Dapat nating tandaang two-fold ang ating paghahanda sa Adbiyento-- paghahanda sa pagdiriwang natin para sa Ika-25 ng Disyembre at para sa katapusan ng panahon.
Pinaaalahanan tayo ng ating Panginoong HesuKristo na pagnilayan ang ating mga buhay. Handa na ba tayo sa Kanyang pagbabalik? Kung mamatay ka bukas o mamaya, handa na ba ang iyong puso? Saan ka pupunta? Sa langit ba o sa impyerno?
Itrato natin ang bawat araw-- ang bawat paggising natin sa umaga-- bilang isang bagong simula patungo kay HesuKristo. Mabuhay tayo na ang ultimate goal ay ang maging katulad ni Kristo. Tularan natin Kanyang paglilingkod at pagmamahal sa Diyos at sa Kapwa.
Araw-araw... isang bagong simula palapit kay Kristo. Palapit sa katapusan. Palapit sa kaligtasan.
