Ikalawang Linggo ng Pasko ng Muling Pagkabuhay
Kapistahan ni Kristo, Hari ng Banal na Awa
Ebanghelyo At Mga Pagbasa Sa Linggo
“Naniniwala ka na ba sapagkat nakita mo ako? Mapapalad ang mga naniniwala kahit hindi nila ako nakita.” (Juan 20:29)
Unang Pagbasa: Gawa 2:42-47
Ang mga kapatid ay nanatili sa itinuro ng mga apostol, sa pagsasama-sama bilang magkakapatid, sa paghahati-hati ng tinapay, at sa pananalangin. Dahil sa maraming himalang nagawa sa pamamagitan ng mga apostol, naghari sa lahat ang magkahalong pitagan at takot.
At nagsama-sama ang lahat ng sumasampalataya at para sa lahat ang kanilang ari-arian. Ipinagbibili nila ito at ang pinagbilhan ay ipinamamahagi sa lahat ayon sa pangangailangan ng bawat isa.
Araw-araw, sila’y nagkakatipon sa templo, naghahati-hati ng tinapay sa kanilang tahanan, at nagsasalusalong masaya ang kalooban. Nagpupuri sila sa Diyos at kinalulugdan ng lahat ng tao. Bawat araw ay idinaragdag sa kanila ng Panginoon ang mga inililigtas.
Salmo: Awit 117
Tugon: Butihing Poo’y purihin,
pagibig n’ya’y walang maliw!
Ang taga-Israel, bayaang sabihi’t kanilang ihayag,
“Ang pag-ibig ng Diyos ay hindi kukupas.”
Mga saserdote ng Diyos na Panginoon, bayaang magsaysay:
“Ang pag-ibig ng Diyos, walang katapusan.”
Lahat ng may takot sa Panginoong Diyos, dapat magpahayag,
“Ang pag-ibig niya’y hindi magwawakas.”
Sinalakay ako’t halos magtagumpay ang mga kaaway,
dahilan sa Poon sila’y napipilan. Dahilan sa Poon ako’y pinalakas,
at ako’y tumatag; siya, sa buhay ko, ang Tagapagligtas.
Dinggin ang masayang sigawan sa tolda ng mga hinirang:
“Panginoo’y siyang lakas na patnubay.”
Ang batong natakwil ng nangagtatayo ng tirahang-bahay,
sa lahat ng bato’y higit na mahusay.
Ang lahat ng ito ang nagpamalas ay ang Panginoong Diyos,
kung iyong mamasdan ay kalugud-lugod.
Ikalawang Pagbasa: 1 Pedro 1:3-9
Purihin natin ang Diyos at Ama ng ating Panginoong Hesukristo. Dahil sa laki ng habag niya sa atin, tayo’y isinilang sa isang panibagong buhay sa pamamagitan ng muling pagkabuhay ni Hesukristo. Ang bagong buhay na iyan ang nagbigay sa atin ng malaking pag-asa na kakamtan natin ang isang kayamanang walang kapintasan, di-masisira, at di-kukupas. Ang kayamanang iya’y nakalaan sa inyo doon sa langit. Sapagkat kayo’y sumampalataya, iingatan kayo ng kapangyarihan ng Diyos samantalang hinihintay ninyo ang kaligtasang nakalaang ihayag sa katapusan ng mga panahon.
Ito’y dapat ninyong ikagalak, bagamat maaaring magdanas muna kayo ng iba’t ibang pagsubok sa loob ng maikling panahon. Ang ginto, na nasisira, ay pinararaan sa apoy upang malaman kung talagang dalisay. Gayon din naman, ang inyong pananampalataya, na higit kaysa ginto, ay pinararaan sa pagsubok upang malaman kung talagang tapat. Sa gayon, kayo’y papupurihan, dadakilain, at pararangalan sa Araw na mahayag si Hesukristo.
Hindi ninyo siya nakita kailanman, ngunit siya’y inibig na ninyo. Hindi pa rin ninyo siya nakikita magpahanggang ngayon, ngunit nananalig na kayo sa kanya. Dahil dito’y nag-uumapaw na sa inyong puso ang kagalakang di kayang ilarawan sa salita. Sapagkat inaani na ninyo ang bunga ng inyong pananampalataya – ang inyong kaligtasan.
Mabuting Balita: Juan 20:19-31
Kinagabihan ng Linggo ding iyon, ang mga alagad ay nagkakatipon. Nakapinid ang mga pinto ng bahay na kanilang pinagtitipunan dahil sa takot nila sa mga Judio. Dumating si Hesus at tumayo sa gitna nila. “Sumainyo ang kapayapaan!” sabi niya. Pagkasabi nito, ipinakita niya ang kanyang mga kamay at ang kanyang tagiliran. Tuwang-tuwa ang mga alagad nang makita ang Panginoon. Sinabi na naman ni Hesus, “Sumainyo ang kapayapaan! Kung paanong sinugo ako ng Ama, gayon din naman, sinusugo ko kayo.” Pagkatapos, sila’y hiningahan niya at sinabi, “Tanggapin ninyo ang Espiritu Santo. Ang patawarin ninyo sa kanilang mga kasalanan ay pinatawad na nga; ang hindi ninyo patawarin ay hindi nga pinatawad.”
Ngunit si Tomas na tinaguriang Kambal, isa sa Labindalawa, ay wala roon nang dumating si Hesus.
Kaya’t sinabi sa kanya ng ibang alagad, “Nakita namin ang Panginoon!” Sumagot si Tomas, “Hindi ako maniniwala hangga’t di ko nakikita ang butas ng mga pako sa kanyang mga kamay, at naisusuot dito ang aking daliri, at hangga’t hindi ko naipapasok ang aking kamay sa kanyang tagiliran.”
Makalipas ang walong araw, muling nagkatipon sa loob ng bahay ang mga alagad; kasama nila si Tomas. Nakapinid ang mga pinto, ngunit pumasok si Hesus at tumayo sa gitna nila. Sinabi niya, “Sumainyo ang kapayapaan!” Saka sinabi kay Tomas, “Tingnan mo ang aking mga kamay at ilapit dito ang iyong daliri. Ipasok mo ang iyong kamay sa aking tagiliran. Huwag ka nang mag-alinlangan, maniwala ka na.” Sumagot si Tomas, “Panginoon ko at Diyos ko!” Sinabi sa kanya ni Hesus, “Naniniwala ka na ba sapagkat nakita mo ako? Mapapalad ang mga naniniwala kahit hindi nila ako nakita.”
Marami pang kababalaghang ginawa si Hesus na nasaksihan ng mga alagad, ngunit hindi natatala sa aklat na ito. Ang mga natala rito’y sinulat upang sumampalataya kayong si Hesus ang Mesiyas, ang Anak ng Diyos, at sa gayo’y magkaroon kayo ng buhay sa pamamagitan niya.
Gospel Reflection
Pagkilos Ng Kamay Ng Diyos
Mahirap unawain ang mga plano ng Diyos. May mga pagkakataong ang akala natin ay pinabayaan na Niya tayo. Sa bigat ng mga dalahin natin. Sa dami ng mga pagsubok na dumarating sa ating buhay.
Minsan nga naitatanong natin, "Bakit ako pa? Ano ba ang ginawa kong kasalanan sa Iyo?" At minsan sinusundan ito ng mga panunumbat, "Hindi naman ako nakakalimot sa 'yo? Wala naman akong inargabyadong tao? Kulang pa ba ang mga ginawa kong kabutihan?"
Madalas kasi iniisip nating kapag gumagawa tayo ng kabutihan, o nagsisilbi tayo sa simbahan, ay nagkakaroon ng utang sa atin ang Diyos. Na ang kabutihan natin ay kailangang palitan Niya ng mga magagandang bagay. Ng maginhawang buhay halimbawa o ng nag-uumapaw na mga biyaya.
Nawawaglit sa isip nating kakatiting ang mga nagawa nating mga kabutihan kumpara sa lahat ng mga ginawa Niya para sa atin. Na halos parang kurot lang ang lahat ng sakit na nararamdaman natin kumpara sa tiniis Niyang pagpapakasakit sa krus para sa atin. Na hindi Niya tayo bibigyan ng pagsubok na hindi natin kaya.
Nabulagan si Tomas ng kanyang pagluluksa dahil sa kamatayan ni Hesus at ng kanyang matinding takot sa mga Hudyo at mga Romano. Hindi Niya nakita ang plano ng Diyos. Nalimutan Niya kung sino si Hesus-- ang kanyang Panginoong nakasama Niya sa loob ng halos tatlong taon.
Nalimutan ni Tomas kung paanong naging saksi sila ng mga kasama sa maraming milagrong ginawa ni Hesus. Ng Kanyang paglalakad sa tubig. Ng pagpapagaling Niya sa mga maysakit at inaalihan ng masamang espiritu. Ng Kanyang pagpapakain sa libu-libong tao nang paramihin Niya ang ilang pirasong isda at tinapay. Nang buhayin Niya si Lazaro at ang iba pang nalagutan na ng hininga.
Inakala Niyang naging talunan na si Hesus. Hindi nga ba't dinanas nito ang matinding hirap sa kamay ng mga kawal-Romano? Hindi nga ba't namatay ito sa isang paraang nababagay lamang sa isang kriminal?
At mga kasamahan niyang mga apostol at ang iba pa, sa isip ni Tomas, silang lahat ay nababaliw na. Nililinlang na sila ng kanilang mga imahinasyon dahil katulad niya'y hindi nila matanggap na patay na ang kanilang Panginoon.
"Gibain ninyo ang Templong ito, at sa loob ng tatlong araw ay muli ko itong itatayo." (Juan 2:19) Si Hesus ang nagturan nito tungkol sa Kanyang kamatayan at muling pagkabuhay.
Marami sa atin ang katulad ni Tomas. Nalilimutan nating ang bawat Biyernes Santo ay may Linggo ng Pagkabuhay. May plano ang Diyos. Ang lahat ng mga pagsubok na dinaranas natin ngayon ay daan patungo sa isang buhay na balak Niya para sa atin.
Magtiwala. Magmahal. Patuloy na umasa sa Kanyang awa. Manalangin. Kumilos nang naaayon sa Kanyang mga utos. Angkining tinugon na Niya tayo. Makakita.
Huwag nating intindihin ang sinasabi ng mundo na to see is to believe dahil sa isang mabuting katoliko, believing is seeing. Sa ating pananalig sa Kanyang pagmamahal at awa, hindi man natin makita ang mga dahilan sa likod ng lahat, in His time, mauunawan natin kung bakit naging gano'n ang kilos ng mga kamay ng Diyos sa ating mga buhay.
At sa araw na iyon, buong kagalakan nating masasambit sa Kanya, "Panginoon ko at Diyos ko!"
Panalangin:
O mapagpala naming Ama, aming Diyos at Panginoon, ang lahat ng pagsamba ay inihahandog namin sa Iyo. Ikaw ang bukal ng aming lakas. Ang tangi naming inaasahan sa aming buhay. Purihin ka ng Iyong bayang nangangailangan ng paghihilom na nagmumula sa mga sugat na tinamo ni Hesus. Mga sugat na nagbukas sa mga mata ni Tomas.
Kami man po ay katulad din ni Tomas. Maraming mga pagkakataong nag-aalinlangan kami sa Iyong kapangyarihan. May mga pagkakataon pa nga pong pinagdurudahan namin pati ang Iyong pagiging totoo. Patawad po sa aming kahinaan. Patawad po kung madali man po kaming sumuko sa harapan ng aming mga problema. Kung agad po naming nalilimutang hindi Mo po kami pinababayaan.
Panginoon, patatagin Mo po ang aming pananampalataya sa Iyo. Kung anuman po ang mga pinagdaraanan namin ngayon, batid po naming kasama Ka naming lagi. Hindi Mo po kami iniiwanan. Na kung anuman po ang idinadalangin namin ngayon, inaangkin po naming tinugon Mo na po kami.
Sa pangalan ni Hesus, ang Hari ng Banal na Awa, binubukalan ng kapatawaran at pag-asa ng mundo, kasama Mo at ng Espiritu Santo. Amen.