Ikaapat na Linggo ng Kuwaresma
Ebanghelyo At Mga Pagbasa Sa Linggo
“Siya’y nakita mo na. Siya ang nakikipag-usap sa iyo,” ani Hesus. (Juan 9:37)
Noong mga araw na iyon: Sinabi ng Panginoon kay Samuel: “Magdala ka ng langis at pumunta ka kay Jesse na taga-Betlehem sapagkat pinili ko nang maging hari ang isa sa kanyang mga anak.”
Nang magkaharap-harap na sila, nakita ni Samuel si Eliab, pinagmasdan niya itong mabuti at sinabi sa sarili, “Ito siguro ang hinirang ng Panginoon para maging hari.”
Ngunit sinabi sa kanya ng Panginoon, “Huwag mong tingnan ang kanyang taas at kakisigan. Hindi siya ang hinirang ko. Ang batayan ko ay di tulad ng batayan ng tao. Panlabas na anyo ang tinitingnan ng tao ngunit puso ang tinitingnan ko.”
Isa-isang tinawag ni Jesse ang pito niyang anak ngunit walang pinili sa kanila ang Panginoon. Kaya’t tinanong ni Samuel si Jesse, “Wala ka na bang anak kundi iyan?”
“Mayroon pang isa; ‘yong pinakabata, at pastol ng aking mga tupa,” sagot ni Jesse.
Sinabi ni Samuel, “Ipasundo mo. Hindi natin sisimulan ang paghahandog hangga’t hindi siya dumarating.” At sinundo nga ang anak na ito ni Jesse. Siya’y makisig na binatilyo, malusog at nangungusap ang mga mata.
At sinabi ng Panginoon kay Samuel, “Siya ang hinirang ko; pahiran mo siya ng langis.” Kinuha ni Samuel ang sisidlan ng langis at pinahiran si David sa harapan ng kanyang mga kapatid. At mula noon, sumakanya ang Espiritu ng Panginoon.
Salmo: Awit 22
Tugon: Pastol ko’y Panginoong Diyos,
hindi ako magdarahop!
Panginoo’y aking Pastol, hindi ako magkukulang.
Ako’y pinahihimlay sa mainam na pastulan,
at inaakay niya ako sa tahimik na batisan,
binibigyan niya ako niyong bagong kalakasan.
At sang-ayon sa pangako na kanyang binitiwan
sa matuwid na landasi’y doon ako inaakay.
Kahit na ang daang iyo’y tumatahak sa karimlan,
hindi ako matatakot pagkat ika’y kaagapay;
ang tungkod mo at pamalo ang gabay ko at sanggalang.
Sa harapan ng lingkod mo, ikaw ay may handang dulang,
ito’y iyong ginagawang nakikita ng kaaway;
nalulugod ka sa akin na ulo ko ay langisan
at pati na ang kalis ko ay iyong pinaaapaw.
Tunay na ang pag-ibig mo at ang iyong kabutihan,
sasaaki’t tataglayin habang ako’y nabubuhay;
doon ako sa templo mo lalagi at mananahan.
Ikalawang Pagbasa: Efeso 5:8-14
Mga kapatid: Dati, nasa kadiliman kayo, ngunit ngayo’y nasa liwanag sapagkat kayo’y sa Panginoon. Mamuhay kayo gaya ng nararapat sa mga taong naliwanagan sapagkat ang ibinubunga ng pamumuhay sa liwanag ay pawang mabuti, matuwid at totoo. Pag-aralan ninyo kung ano ang kalugud-lugod sa Panginoon. Huwag kayong makikisama sa mga taong gumagawa ng mga bagay na walang ibubungang kabutihan – mga bagay na dulot ng kadiliman. Sa halip ay ilantad ninyo sila at ang kanilang mga gawa. Sapagkat kahiya-hiyang banggitin man lamang ang mga bagay na ginagawa nila nang lihim. Ang lahat ng nalalantad ay naliliwanagan, at ang naliwanagan ay nagiging liwanag. Kaya’t sinasabi, “Gumising ka, ikaw na natutulog, magbangon ka mula sa mga patay, at liliwanagan ka ni Kristo.”
Mabuting Balita: Juan 9:1.6-9.13-17.34-38
Noong panahong iyon: Sa paglalakad ni Hesus ay may nakita siyang isang lalaking ipinanganak na bulag. At si Hesus ay lumura sa lupa at gumawa ng putik. Ipinahid niya ito sa mata ng bulag. Sinabi sa kanya ni Hesus, “Pumunta ka sa deposito ng tubig sa Siloe.” (Ang kahulugan nito’y Sinugo.) “Maghilamos ka roon.” Gayon nga ang ginawa ng bulag at nang magbalik ay nakakikita na.
Sinabi ng mga kapitbahay niya at ng mga nakakita sa kanya noong siya’y namamalimos pa, “Hindi ba iyan ang lalaking dating nagpapalimos?” Sumagot ang ilan, “Iyan nga!” “Hindi! Kamukha lang,” wika naman ng iba. At sumagot ang lalaki, “Ako nga po iyon.”
Dinala nila sa mga Pariseo ang dating bulag. Araw ng Pamamahinga nang gumawa si Hesus ng putik at padilatin ang bulag. Tinanong din siya ng mga Pariseo kung paano siya nakakita. Sinabi niya sa kanila, “Pinahiran niya ng putik ang aking mga mata, naghilamos ako pagkatapos, at ngayo’y nakakikita na ako.” Ang sabi ng ilan sa mga Pariseo, “Hindi mula sa Diyos ang taong iyan, sapagkat hindi niya ipinangingilin ang Araw ng Pamamahinga.” Ngunit sinabi naman ng iba, “Paanong makagagawa ng ganitong kababalaghan ang isang makasalanan?” At hindi sila magkaisa ng palagay. Kaya’t tinanong nila uli ang dating bulag, “Ikaw naman, yamang pinadilat ni Hesus ang iyong mga mata, ano naman ang masasabi mo tungkol sa kanya?” “Siya’y isang propeta!” sagot niya. Sumagot sila, “Ipinanganak kang makasalanan at ikaw pa ang magtuturo sa amin?”At siya’y itiniwalag nila.
Nabalitaan ni Hesus na ang lalaking pinagaling niya ay itiniwalag ng mga Pariseo. Kaya’t tinanong niya ang lalaki nang matagpuan niya ito, “Sumasampalataya ka ba sa Anak ng Tao?” Sumagot ang lalaki, “Sino po ba siya, Ginoo? Sabihin ninyo sa akin, upang ako’y manampalataya sa kanya.” “Siya’y nakita mo na. Siya ang nakikipag-usap sa iyo,” ani Hesus. “Sumasampalataya po ako, Panginoon!” sabi ng lalaki. At sinamba niya si Hesus.
Gospel Reflection
In The Light Of Jesus
Una kong narinig ang terminong "free will" sa kaibigan kong nag-aaral noon ng Philosophy sa isang unibersidad sa Maynila. Siya 'yung kaibigan kong madalas kong nakakausap noon ng kung ilang oras tungkol sa mga bagay-bagay sa Pilosopiya.
Ang free will-- o ang kakayahang magdesisyon para sa sarili-- ang isa sa pinakamagandang handog sa atin ng Diyos. Masasabi ring isa ito sa pinakamapanganib kung gagamitin sa maling paraan.
Sa Ebanghelyo natin ngayong linggo, makikita natin ang iba't-ibang reaksyon ng mga tao sa himalang ginawa ni Hesus sa isang lalaking nakakita matapos maging bulag sa buo niyang buhay. Kitang-kita natin kung paanong ginamit ng mga taong nakapaligid sa pinaghimalaang bulag ang kanilang free will. Ang ilan sa kanila ay naniwala sa himala samantalang ang iba naman ay hindi. Kahit na ang mga Pariseo ay nahati sa kanilang palagay ukol sa nangyari sa bulag.
Ang bawat tao ay may kakayahang magdesisyon para sa kanyang sarili. Nasa ating pagpili na kung maniniwala tayo at susunod sa mga aral ni Hesus. Hindi ipinipilit ng Diyos sa atin ang Kanyang sarili. Araw-araw Niyang ipinapakita at ipinadarama sa atin ang Kanyang pag-ibig. Nasa atin na kung pag-ibig din ang igaganti natin sa Kanya o tatalikod tayo sa Kanyang mga pagtawag.
Sa Kuwaresmang ito, maging tulad sana tayo sa lalaking bulag na nakakita sa pamamagitan ng Liwanag ni Kristo. Siya ang ating lakas at tagapagsagip sa gitna ng kadiliman. Gabayan sana tayo ng Banal Na Espiritu upang makita at masunod natin ang kalooban ng Diyos sa ating buhay.
Mapanganib ang maling paggamit ng free will. Ginamit ito ng mga pariseo upang lumakad patungo sa kanilang kapahamakan. Ito rin ang ginamit nila upang pagplanuhang ipapatay si Hesus.
Gamitin natin ang ating free will upang lumakad sa liwanag ng Kristo. Kasama ang ating matibay na desisyon, pasanin natin ang pang-araw-araw nating krus sa pagsunod kay Hesus na naparito upang bigyang-liwanag ang mga bulag at makasalanang tulad natin.
Liwanag o kadiliman? Nasa mga kamay natin ang pagpili. Ikaw at ako ay may free will.
Gamitin natin ang ating free will upang lumakad sa liwanag ng Kristo. Kasama ang ating matibay na desisyon, pasanin natin ang pang-araw-araw nating krus sa pagsunod kay Hesus na naparito upang bigyang-liwanag ang mga bulag at makasalanang tulad natin.
Liwanag o kadiliman? Nasa mga kamay natin ang pagpili. Ikaw at ako ay may free will.
Panalangin:
O mahal naming Diyos, o aming Amang palagiang nagmamahal at kumakalinga sa amin, sa kabila ng aming karumihan at pagiging hindi karapat-dapat, hayaan po Ninyong sa gabay ng Iyong Salitang siyang Liwanag ng mundo, purihin Kang lagi ng aming kaluluwa, buong kalakasan, buong-puso at buong-pag-iisip. Ang lahat ng ito ay nagmula sa Iyo, ang lahat ng kaluwalhatian ay ibinabalik namin sa Iyo.
Sa paggabay ng Espiritu Santo, matutunan sana po naming makakita ng tunay na Liwanag sa aming pang-araw-araw na buhay. Tulungan Mo po kaming tanggapin ang Kanyang pag-ibig at pagliligtas. Angkinin po sana namin ang Kanyang pag-ibig na ipinakita niya sa pamamagitan ng Kanyang pagkamatay sa krus para sa amin.
Dumating Siya sa mundo subalit hindi Siya kinilala ng mundo. Turuan Mo po kaming tumalikod sa kasalanan at tahakin ang hindi madaling landas patungo sa liwanag ng kaligtasan. Salamat po sa Iyong pagpapatawad na ipinagkakaloob Mo sa mga tulad naming nagsisisi.
Aming Ama, salamat po sa kalayaang ipinagkaloob Mo. Gamitin po sana namin ito sa aming pagtulong at pag-ibig sa aming kapwang higit na aba kaysa sa amin.
Ang lahat ng ito sa Liwanag ni Hesus na kasama Mong lagi at ng Espiritu Santo. Amen.
Sa paggabay ng Espiritu Santo, matutunan sana po naming makakita ng tunay na Liwanag sa aming pang-araw-araw na buhay. Tulungan Mo po kaming tanggapin ang Kanyang pag-ibig at pagliligtas. Angkinin po sana namin ang Kanyang pag-ibig na ipinakita niya sa pamamagitan ng Kanyang pagkamatay sa krus para sa amin.
Dumating Siya sa mundo subalit hindi Siya kinilala ng mundo. Turuan Mo po kaming tumalikod sa kasalanan at tahakin ang hindi madaling landas patungo sa liwanag ng kaligtasan. Salamat po sa Iyong pagpapatawad na ipinagkakaloob Mo sa mga tulad naming nagsisisi.
Aming Ama, salamat po sa kalayaang ipinagkaloob Mo. Gamitin po sana namin ito sa aming pagtulong at pag-ibig sa aming kapwang higit na aba kaysa sa amin.
Ang lahat ng ito sa Liwanag ni Hesus na kasama Mong lagi at ng Espiritu Santo. Amen.