Ika-20 Linggo sa Karaniwang Panahon (A)
Ebanghelyo At Mga Pagbasa
“Tunay nga po, Panginoon,” tugon ng babae, “ngunit ang mga tuta man ay nagsisikain ng mumong nalalaglag sa hapag ng kanilang panginoon.” (Mateo 15:27)
Ang sabi ng Panginoon sa kanyang bayan: “Ayon sa katarungan at laging matuwid ang inyong gagawin. Ang pagliligtas ko’y di na magluluwat, ito ay darating. Ito’y mahahayag sa inyong paningin.”
Ito naman ang sabi ng Panginoon sa mga dating dayuhan na ngayo’y kabilang sa kanyang bayan, buong pusong naglilingkod sa kanya, nangingilin sa Araw ng Pamamahinga, at matapat na nag-iingat sa kanyang tipan:
“Dadalhin ko kayo sa Sion, sa aking banal na bundok. Ipadarama ko sa inyo ang kagalakan sa aking Templo. Tatanggapin ko ang inyong mga handog, at ang Templo ko’y tatawaging bahay-dalanginan ng lahat ng bansa.”
Salmo: Awit 66
Tugon: Nawa’y magpuri sa iyo
ang lahat ng mga tao!
O Diyos, pagpalain kami’t kahabagan,
kami Panginoo’y iyong kaawaan,
upang sa daigdig mabatid ng lahat
ang iyong kalooban at ang pagliligtas.
Nawa’y purihin ka ng mga nilikha,
pagka’t matuwid kang humatol sa madla;
ikaw ang patnubay ng lahat ng bansa.
Purihin ka nawa ng lahat ng tao,
purihin ka nila sa lahat ng dako.
Ang lahat sa ami’y iyong pinagpala,
nawa’y igalang ka ng lahat ng bansa.
Ikalawang Pagbasa: Roma 11:13-15.29-32
Mga kapatid: Ito naman ang sasabihin ko sa inyo, mga Hentil. Yamang ako’y apostol ninyo, pinangangatawanan ko ang aking ministeryo upang mangimbulo ang mga kababayan ko, at sa gayo’y maligtas ang ilan sa kanila.
Kung naging daan ng pakikipagkasundo ng sanlibutan sa Diyos ang pagkakatakwil sa kanila, ang muling pagtanggap sa kanila’y para na ring pagbibigay-buhay sa patay.
Ang Diyos ay hindi nagbabago ng isip tungkol sa kanyang mga kaloob at pagtawag. Dati, masuwayin kayo sa Diyos, ngunit ngayo’y kinahahabagan sa panahon ng pagsuway ng mga Judio. Gayundin naman, sila’y naging masuwayin ngayong kayo’y kinahahabagan upang sila’y kahabagan din. Sapagkat hinayaan ng Diyos na maalipin ng kanilang kasalanan ang lahat ng tao upang maipadama sa kanila ang kanyang habag.
Mabuting Balita: Mateo 15:21-28
Noong panahong iyon, si Hesus ay nagpunta sa lupaing malapit sa Tiro at Sidon. Lumapit sa kanya ang isang Cananeang naninirahan doon at malakas na sinabi, “Panginoon, Anak ni David, mahabag po kayo sa akin! Ang anak kong babae ay inaalihan ng demonyo at masyadong pinahihirapan.” Ngunit gaputok ma’y di tumugon si Hesus.
At lumapit ang kanyang mga alagad at sinabi sa kanya, “Pagbigyan na nga po ninyo at nang umalis. Siya’y nag-iingay at susunud-sunod sa atin.” Sumagot si Hesus, “Sa mga tupang naliligaw ng sambahayan ng Israel lamang ako sinugo.”
Ngunit lumapit sa kanya ang babae, lumuhod sa harapan at ang sabi, “Tulungan po ninyo ako, Panginoon.” Sumagot si Hesus, “Hindi dapat kunin ang pagkain ng mga anak upang ihagis sa mga tuta.” “Tunay nga po, Panginoon,” tugon ng babae, “ngunit ang mga tuta man ay nagsisikain ng mumong nalalaglag sa hapag ng kanilang panginoon.” Kaya’t sinabi sa kanya ni Hesus, “Napakalaki ng iyong pananalig! Mangyayari ang hinihiling mo.” At noon di’y gumaling ang kanyang anak.
Gospel Reflection
Ang bawat nakakandadong pinto ay may kaukulang susi. Katulad ng babae sa ating Ebanghelyo, marami sa atin ang humihingi ng himala. Maraming klase ng himala. May malalaking himala. May mumunting himala. Ano nga ba ang susi upang kamtin ang isang himala?
Pananampalataya. Sinabi ni Hesus, "kung may pananampalataya kayong sinlaki ng buto ng mustasa, masasabi sana ninyo sa bundok na ito na gumalaw mula rito at gagalaw ito. At walang magiging imposible para sa inyo." (Mateo 17:20) Lubhang napakalakas ng kapangyarihan ng pananampalataya. Sabi nga ng ating mga lay speakers, anuman ang hinihingi mo sa panalangin, angkinin mo nang natanggap mo na at matatanggap mo ito.
Pagpapakumbaba. Dapat nating tandaang tayo'y mga lingkod lamang ng Diyos. Tayo ang humihingi ng Kanyang awa at pagpapala. Kahit na gaano karaming kabutihan ang gawin natin, kulang na kulang ito kung ikukumpara sa Kanyang kabutihan.
Bukas na kalooban. May plano ang Diyos para sa atin. Huwag nating pangunahan ang Kanyang mga plano. Marami kasi sa atin ang mas marunong pa sa Diyos. Alam Niya kung ano ang mas makabubuti sa atin. Maging bukas tayo sa Kanyang kalooban.
Ganap na pagsuko. Ibigay natin ang lahat sa Diyos. Itaas natin sa Kanya ang lahat ng ating mga problema. Patuloy tayong gumawa sa pag-asang tutulungan tayo ng Diyos. Isipin nating ang lahat ng ating mga paghihirap at pagpapakasakit ay pakikihati natin sa Kanyang pasyon. Sa pagpapasakop natin sa Kanyang kalooban, tayo'y nagtitiwalang hindi Niya tayo kailanman pababayaan.
Ang tunay na himala'y hindi ang pagkakamit nito kundi ang ganap na paghahangad at pagpapasakop sa walang-hanggang pag-ibig ng Diyos. Dahil gaano man kadakila ang isang himala, mumu lamang ito kung ikukumpara sa walang hanggang buhay na inihanda Niya para sa mga nananalig sa Kanya. Kamtin man natin o hindi ang minimithi natin, kapayapaan at ganap na pagtitiwala sa Diyos ang magiging bunga nito. Gusto mo bang dumanas ng himala sa araw na ito? Pagyakap sa pag-ibig Niya ang susi dito.
O aming Ama, ang lahat ng pagluwalhati at pasasalamat ay sa Iyo. Ang kabutihan at pag-ibig mo'y hindi magmamaliw. Ang puso namin at buong buhay ay ipinagkakaloob po namin sa Iyo. Gamitin Mo po kami para sa Iyong kaluwalhatian.
Sa pamamagitan po sana ng aming mga paghihirap, makita ng iba na ako'y iniibig Mo at hindi Mo ako pinababayaan. Totoo pong may mga hinahangad kaming tila imposible subalit Panginoon, lumuluhog po kami sa Iyo, tulungan Mo po kami.
Sa araw-araw ng aming buhay, makita po sana naming lagi ang Iyong mukha sa aming kapwang nangangailangan ng tulong. Batid po naming naghihirap din silang katulad namin. Maramdaman po sana nila ang pag-ibig Mo sa pamamagitan namin.
Ang lahat po ng ito ay itinataas namin sa matamis na Pangalan ni Hesus, nabubuhay at naghaharing kasama Mo at ng Espiritu Santo. Amen.
Keys To A Miracle?
Pananampalataya. Sinabi ni Hesus, "kung may pananampalataya kayong sinlaki ng buto ng mustasa, masasabi sana ninyo sa bundok na ito na gumalaw mula rito at gagalaw ito. At walang magiging imposible para sa inyo." (Mateo 17:20) Lubhang napakalakas ng kapangyarihan ng pananampalataya. Sabi nga ng ating mga lay speakers, anuman ang hinihingi mo sa panalangin, angkinin mo nang natanggap mo na at matatanggap mo ito.
Pagpapakumbaba. Dapat nating tandaang tayo'y mga lingkod lamang ng Diyos. Tayo ang humihingi ng Kanyang awa at pagpapala. Kahit na gaano karaming kabutihan ang gawin natin, kulang na kulang ito kung ikukumpara sa Kanyang kabutihan.
Bukas na kalooban. May plano ang Diyos para sa atin. Huwag nating pangunahan ang Kanyang mga plano. Marami kasi sa atin ang mas marunong pa sa Diyos. Alam Niya kung ano ang mas makabubuti sa atin. Maging bukas tayo sa Kanyang kalooban.
Ganap na pagsuko. Ibigay natin ang lahat sa Diyos. Itaas natin sa Kanya ang lahat ng ating mga problema. Patuloy tayong gumawa sa pag-asang tutulungan tayo ng Diyos. Isipin nating ang lahat ng ating mga paghihirap at pagpapakasakit ay pakikihati natin sa Kanyang pasyon. Sa pagpapasakop natin sa Kanyang kalooban, tayo'y nagtitiwalang hindi Niya tayo kailanman pababayaan.
Ang tunay na himala'y hindi ang pagkakamit nito kundi ang ganap na paghahangad at pagpapasakop sa walang-hanggang pag-ibig ng Diyos. Dahil gaano man kadakila ang isang himala, mumu lamang ito kung ikukumpara sa walang hanggang buhay na inihanda Niya para sa mga nananalig sa Kanya. Kamtin man natin o hindi ang minimithi natin, kapayapaan at ganap na pagtitiwala sa Diyos ang magiging bunga nito. Gusto mo bang dumanas ng himala sa araw na ito? Pagyakap sa pag-ibig Niya ang susi dito.
Panalangin:
Sa pamamagitan po sana ng aming mga paghihirap, makita ng iba na ako'y iniibig Mo at hindi Mo ako pinababayaan. Totoo pong may mga hinahangad kaming tila imposible subalit Panginoon, lumuluhog po kami sa Iyo, tulungan Mo po kami.
Sa araw-araw ng aming buhay, makita po sana naming lagi ang Iyong mukha sa aming kapwang nangangailangan ng tulong. Batid po naming naghihirap din silang katulad namin. Maramdaman po sana nila ang pag-ibig Mo sa pamamagitan namin.
Ang lahat po ng ito ay itinataas namin sa matamis na Pangalan ni Hesus, nabubuhay at naghaharing kasama Mo at ng Espiritu Santo. Amen.