Ika-32 Linggo sa Karaniwang Panahon (A)
Ebanghelyo At Mga Pagbasa
Ang Karunungan ay maningning at di kumukupas. Madaling natatagpuan ng naghahanap sa kanya, at nakikita agad ng mga nagpapahalaga sa kanya. Madali siyang nagpapakilala sa mga naghahangad sa kanya. Hanapin mo siyang maaga at agad mo siyang matatagpuan. Makikita mo siyang nag-aabang sa iyong tarangkahan. Isipin mo lamang siya’y magkakaroon ka ng ganap na pagkaunawa. Hanapin mo siya’t matatahimik ang iyong kalooban. Pagkat hinahanap niya ang mga karapat-dapat sa kanya, at makikita ka niya saan ka man naroon. Siya’y maamo at sasamahan ka niya sa bawat iniisip mo.
Salmo: Awit 62
Tugon: Aking kinasasabikan,
Panginoon, ikaw lamang!
O Diyos, ikaw ang aking Diyos na lagi kong hinahanap;
ang uhaw kong kaluluwa’y tanging ikaw yaong hangad;
para akong tuyong lupa na tubig ang siyang lunas.
Bayaan mong sa santwaryo, sa lugar na dakong banal,
ikaw roo’y mamasdan ko, sa likas mong karangalan.
Ang wagas na pag-ibig mo’y mahigit pa kaysa buhay,
kaya ako’y magpupuri’t ikaw ang paguukulan.
Habang ako’y nabubuhay, ako’y magpapasalamat,
at ako’y dadalangin na kamay ko’y nakataas.
Itong aking kaluluwa’y kakaing may kasiyahan,
magagalak na umawit ng papuring iaalay.
Laman ka ng gunita ko samantalang nahihimlay,
magdamag na ang palaging iniisip ko ay ikaw;
pagkat ikaw sa tuwina ang katulong na malapit,
sa lilim ng iyong pakpak galak akong umaawit.
Ikalawang Pagbasa: 1 Tesalonica 4:13- 18
Mga kapatid: Ibig naming malaman ninyo ang katotohanan tungkol sa mga namatay na, nang hindi kayo magdalamhati, tulad ng mga taong walang pag-asa. Naniniwala tayong si Hesus ay namatay at muling nabuhay. Kaya naman, naniniwala tayong bubuhayin din ng Diyos ang lahat ng namatay na nananalig kay Hesus – upang isama sa kanya.
Ito ang aral ng Panginoon na sinasabi namin sa inyo: pagparito ng Panginoon, tayong mga buhay ay hindi mauuna sa mga namatay na. Sa araw na yaon, kasabay ng malakas na utos ng tinig ng arkanghel, at ng tunog ng trompeta ng Diyos, bababa ang Panginoon mula sa langit. Bubuhayin muna ang mga namatay na nananalig kay Kristo. Pagkatapos, tayong mga buhay pa ay titipunin niya sa ulap at isasama sa mga binuhay upang salubungin sa papawirin ang Panginoon. Sa gayo’y makakapiling niya tayo magpakailanman.
Kaya nga, mag-aliwan kayo sa pamamagitan ng mga aral na ito.
Mabuting Balita: Mateo 25:1-13
Noong panahong iyon, sinabi ni Hesus sa kanyang mga alagad ang talinghagang ito: “Dito maitutulad ang pagpasok sa kaharian ng Diyos: may sampung dalagang lumabas upang sumalubong sa lalaking ikakasal. Bawat isa’y may dalang ilawan. Ang lima sa kanila’y hangal at ang lima’y matalino. Ang mga hangal ay nagdala ng kanilang mga ilawan ngunit hindi nagbaon ng langis. Subalit ang matatalino’y nagdala ng langis bukod pa sa nasa kanilang ilawan.
Nabalam ng dating ang lalaking ikakasal, kaya’t inantok silang lahat at nakatulog. Ngunit nang hatinggabi na’y may sumigaw: ‘Narito na ang lalaking ikakasal! Salubungin ninyo!’ Agad nagbangon ang sampung dalaga at inayos ang kanilang ilawan. Sinabi ng mga hangal sa matatalino, ‘Bigyan naman ninyo kami ng kaunting langis. Aandap-andap na ang aming mga ilawan, e.’ ‘Baka hindi magkasiya ito sa ating lahat,’ tugon ng matatalino. ‘Mabuti pa’y pumunta muna kayo sa nagtitinda at bumili ng para sa inyo.’
Kaya’t lumakad ang limang hangal na dalaga. Samantalang bumibili sila, dumating ang lalaking ikakasal. Ang limang nakahanda ay kasama niyang pumasok sa kasalan, at ipininid ang pinto. Pagkatapos, dumating naman ang limang hangal na dalaga. ‘Panginoon, papasukin po ninyo kami!’ sigaw nila. Ngunit tumugon siya, ‘Sinasabi ko sa inyo: hindi ko kayo nakikilala.’
Kaya magbantay kayo, sapagkat hindi ninyo alam ang araw ni ang oras.”
Gospel Reflection
Light of Jesus
Nasa liwanag ka ba? O isa ka sa maraming tao ngayong naglalagi sa kadiliman?
Ang sabi ni Hesus, ang mga taong gumagawa ng masama ay nasa kadiliman dahil ayaw nila sa liwanag. Ayaw nilang malaman ng iba ang kanilang ginagawa ng lihim. (Juan 3:20)
Sa Ebanghelyo natin ngayong linggo, hinihimok tayong maging handa sa pagdating ng Nobyong kinakatawan ng ating Panginoong Hesus. Hinihimok tayong panatiliing nagniningas ang liwanag sa ating mga ilawan katulad ng mga dalagang matatalino. Naghanda sila ng kanilang reserbang langis.
Iisa ang tiyak. Darating ang Nobyo. Darating ang katapusan ng mundo. Darating ang ating kamatayan. Nasa atin na ba ang Liwanag? Handa na ba tayo?
Si Hesus ang Liwanag ng mundo. Siya ang Liwanag na dumating sa mundo. Dumating Siya subalit hindi Siya kinilala ng mundo. (Juan 1) Kung hindi natin Siya tatanggapin sa ating buhay, mananatili tayong nasa kadiliman.
Sabi nga ng isang pari sa kanyang Homiliya, iba ang Langit sa Kaharian ng Diyos. Ang Kaharian ng Diyos ay dinala ni Hesus sa mundo nang magkatawang-tao Siya. Kaya nasa atin na ang paghahari ng Diyos kung naghahari Siya sa buhay natin.
Nasa atin nga ba si Hesus? Pinagsisikapan nga ba nating maging Christ-like ang ating buhay? Isinasabuhay ba natin ang Kanyang Salita? Iniibig ba natin ang Diyos ng higit sa lahat? Iniibig ang ating kapwa katulad ng ating sarili? Sinisikap ba nating kilalanin si Hesus? Nabubuhay ba tayo sa paggabay ng Espiritu Santong Tagapagpabanal?
Kung mamatay tayo mamayang gabi, handa na ba tayo? O baka kasama tayo sa sasabihan ng Diyos, "Hindi ko kayo kilala!"?
Panatilihin si Kristo sa ating mga puso. Hayaan nating manatili sa atin ang Kanyang Liwanag. Dahil ang nagtataglay ng Kanyang Liwanag ang makapapasok sa pintuan ng kaligtasan. At ang Kanyang Liwanag ay makapananaig sa kadiliman-- kahit na sa kadiliman ng kamatayan.
Panalangin:
Panginoon naming Diyos, papuri, pagsamba at pagluwalhati ang handog namin sa Iyo. Ikaw ang aming Panginoon. Ikaw ang Una sa aming buhay. Diyos ng Pag-ibig na palagiang kumakalinga sa amin.
Hayaan Mo pong sa kabila ng aming mga kahinaan ay magawa naming makalapit sa Iyo. Ikaw ang aming Amang patuloy na nagpapatawad sa amin sa kabila ng aming mga kahinaan at kasalanan.
Ama, mabuhay po sana kami sa paggabay ng Espiritu Santong aming lakas at pag-asa. Turuan po nawa Niya kaming tumulad sa aming tagapagligtas na si HesuKristo.
Sumaamin po nawa ang grasya ng Kaligtasang kaloob ni Kristo. Tunay nga pong wala po kaming magagawa kung hiwalay kami sa Iyong Anak.
Ama, umaasa po kami sa Iyong walang hanggang awa. Sa pangalan ni Hesus, ang Liwanag ng aming buhay na inaasahan naming sumaamin hanggang sa aming kamatayan, nabubuhay at naghaharing kasama Mo at ng Espiritu Santo. Amen.